John 6
'Aila'a 5000 Iesu i ve'anidi.
1Mulieta me Diu yadi Sakali Uvi'agalatagona sai'afoga 'ana tutuya i na veluagai, Iesu wata yana tovetutuyamavo i viladi i damana Lavu Galili, me Loma bonadiega Lavu Taibilia. 'Aila'a bwaikina Iesu i yoyogo'waili fai 'akonadi yana folova toketokena i 'isedi toviga 'waidie. Iesu wata yana tovetutuyamavo taiadi i laka 'oyeye bei i miabui. 5Iesu i 'isanago 'aila'a bwaikina i 'isedi i mimaia 'waidie begaidi i velutoli Filifi 'waineye i vo, Bani'odi ta na munega 'ani'ani sai'afo moso'ina ta na kimwanei 'aila'a no'o ta na ve'anidi?” 6Iesu 'akonadi i 'asetai 'ako bani'odi i na munega bega 'aila'a i na ve'anidi, siwe nuanuana Filifi yana vetumagana i na sitonovi begaidi i velutoli. 7Filifi Iesu yana velutoli i tutuli i vo, 'Ai'edi de'e tomotoganidi 'ani'ani siaina siaina i na 'aniga, tutulina lubulubu 200 ▼▼Me Diu yadi mani Denali 200. Denali 'aitamogana, 'aiata 'aitamogana 'ana folova tutulina.
igodi ta kimwaneyeniga 'ana fata.” 8Saimoni Fita taina, tamu Iesu yana tovetutuyama 'ana wagava Anidulu, i vona Iesu 'waineye i vo, Sino tamu kwamana nimaneye 'ani'ani mwadodoudi 5 wata igana vakavakalidi 'ailuga. Siwe ava'ai 'ana 'atumaina? 'Ani'ani siaina we'e 'aila'a bwaikina.” 10Bei mosomoso bikadi wata 'ale'usadi bega Iesu yana tovetutuyamavo i vonedi i vo, Tomotoga 'wa vemiabuidi mosomoso tabwadie.” Bega tomotoga i miabui iaveta tulai'avadi 'adi 'aila'a 5000, siwe wata vevine yavayavava taiadi. 11Iesu 'ani'ani mwadodoudi i 'ewadi, Yaubada 'waineye i vekaiwa, mulieta yana tovetutuyamavo i veledi i veusedi tomotoganidi i miabuiga 'waidie. Wata bani'odi igana i munegidi, matatabudi i 'ani kamodi i aidi. 12I 'ani'a'ava Iesu yana tovetutuyamavo i vonedi i vo, Nuanuaku 'ani'ani 'wa veuseni we'e 'ifwaidi 'wa luvegelalediga 'wa na kwakwadi bega kebu tamu ta na 'ivekokovi.” 13Matatabuna i kwakwadi bayawa 12 i vedodogidi i adaga.14Tomotoganidi Iesu yana folova toketokena i 'iseni i vo, Vona mogitana, Iesu kumanina tolu'ivonanina basenadiotoga Yaubada i vona'awaufaufa i vo, I na mai.” 15Iesu tomotoga yadi nuanua i 'asetai nuanuadi i na 'ive'avini i na naweni i na ve-kini faifaidi, begaidi i tovoi wata 'aisena i vilai i laka 'oyeye fai kebu nuanuana.
- S14 Fol 3:22S15 Mad 14:23
Iesu ufa tabwaneamo i nago.
16Iesu i laka 'oyeye, we'e lavilavie yana tovetutuyamavo i obu balebaleye. 17Bei Iesu i lulukamaseni nika 'akonadi i lovani begaidi i dodoga i na nagoi Kafaneomi. 18I damadamana nika kaukau wata yagina bwaikidi i veluagadi. 19I tokemaigedi i voi i nago sai'afo manamanawena ▼▼'Ana mogitana bani'odi 5 'alo 6 kilomita.
nika Iesu i 'iseni ufa tabwaneamo i mimai waka lilivaneye, matatabudi i kololo-'afo'afo. 20Iesu i vonedi i vo, Kebu 'wa na kolologa, yau taunida.” 21Tutuyanina i 'asetai mogitana Iesu, i voneni i dodoga nika waka i lilide i duduna-matayo'o Kafaneomi.- S16-17 Mak 6:46
Tomotoga nuanuadi Iesu.
22I 'atai, we'e tomotoga bei i ve'anidiga no'o bei i miamiani, igodi Iesu i lulukamaseni balebaleye, fai yadi 'aseta i vo, Wakanina i mieniga 'akonadi tovetutuyamavo 'aisedi 'wainega i viladi.” 23We'e waka tulidi 'atamana Taibilia 'wainega i nagoi i luku bei Iesu 'aila'a i ve'anidiga lilivaneye. 24Tutuyanina 'aila'a Iesu i 'isa'avai wata yana tovetutuyamavo, wakanidi 'waidie i dodoga i lualedi i maia Kafaneomi.Iesu taunina 'ani'ani yada mia 'ivauna wata 'atumaina faifaina.
25Tomotoga Iesu i lulualeni nika i veluagai Kafaneomi 'eba miava'auta nageneye, i velutolieni i vo, Tove, ma'avia 'u mai de'e bei?” 26Iesu i vonedi i vo, A vona mogitana 'waimie, yaku folova toketokena 'wa 'iseni siwe kebu faifaina 'wa da vetumagana 'waikuye 'wa da yoyogo'wai'waila, a ve'animiga faifaina 'wa yoyogo'wai'waila. 27Kebu i da lubwainemi 'ani'ani 'ana nuanua i na vebwaika 'waimie, fai bola 'ani'aninidi i na koga wata i na 'anikudadi. 'Ani'aninina kumanina 'wainega mia 'atumaina wata miamia-vagaina 'wa na veluagaiga, i lubwainemi faifaina 'wa na nuanua. Yau a vetomotogaotoga Tamada Yaubada i venua'ivineku 'aku fata 'ani'aninina 'atumaina a na velemi.” 28Tomotoga i velutoli Iesu 'waineye i vo, Bani'odi 'a na munega Yaubada yana folova 'a na 'idewadi?” 29Iesu i vo, Yaubada nuanuana yami folova side bani'odi. Yau i vetunekuga 'wa na vetumaganekumo. Siwe 'asa'aiana yami folova.”30Yana vona i tutuli i vo, Nuanuama yamu folova toketokena ma 'ana 'eba 'isa 'u na 'idewai, bega 'a na 'iseni 'a na 'asetai Yaubada i vetunemu, 'waimuye 'a na vetumagana. Siwe ava'ai folovaga toketokena 'u na 'idewai? 31Basenadiotoga sali'avu'avuye tubudavo i yabayaba 'adi'adi kebu, bega Yaubada 'ani'ani tamu 'ana wagava mana i veledi abamega, wata bani'odi basenadiotoga i kilumi Yaubada yana Buki 'waineye i vo, 'Ani'ani abamega i veledi i 'ani.” 'Auvea, nuanuama 'omu wata bani'odi 'aiata 'aitamogana 'aitamogana 'ani'ani 'u na velevelema.” 32Iesu i vonedi i vo, A vona mogitana 'waimie, we'e 'ani'aninina kebu Mosese yana 'anivelenaga, Tamaku yana 'anivelena abamega, siwe 'asiau nuanuana tamu 'ani'ani i na velemi, 'ani'aninina 'ani'ani mogitana. 33'Ani'aninina mogitana tamu tomogo, siwe 'asa'aiana taunina 'ani'ani. Tomogonina abamega i obuma bega tomia fwayafwaya mia 'ivauna wata 'atumaina 'wa na veluagai.” 34Tomotoganidi i vo, 'Auvea, 'ani'aninina nuanuama tutuya fuedi 'u na velevelema.” 35Iesu i vonedi i vo, Yau 'asa'aiana kumaniku 'ani'ani. Yau mia 'ivauna wata 'atumaina 'ana to'anivelena tomotoga 'waimie. 'Ai'edi egavo i na mai 'waikuye kebu i na lasega, wata 'ai'edi egavo i na vetumagana 'waikuye kebu 'anigodi i na lala.
36'Akonadi a vonemi, matamie yaku folova toketokena a 'idewai 'wa 'iseni siwe kebu 'wa da vetumagana 'waikuye. 37Tomotoganidi Tamada i na 'anivelenedi, matatabudi i na maia 'waikuye wata kebu tamu sai'afo a na vedumwe'ai'aiedi. 38Yau a maiga abamega 'aku tovetune yana nuanua a na 'idewadi, kebu tauniku yaku nuanuaga. 39'Aku tovetunenina yana nuanua side bani'odi. Nuanuana tomotoganidi i 'anivelenedi 'waikuye a na 'ita'ita'iedi, kebu tamu aitoi a na baileniga, wata tutuyanina tomotoga 'wa na vonayavuga Yaubada mataneye, yaku tomotoga yawaidi a na veledi i na tovoi-vaitugana. 40Side bani'odi. Tamaku nuanuana tomotoga matatabumi taunimi 'wa na tauyemi 'waikuye 'wa na vetumagana, mia 'atumaina wata miamia-vagaina 'wa na veluagai wata tutuyanina tomotoga 'wa na vonayavuga Yaubada mataneye a na sivetovoimi.”
- S27 Ion 6:48-51S29 1 Ion 3:23S31 Sou 16:4,14-15
- S35 Ion 4:14S37 Ion 17:6-8S39 Ion 10:28-29, 17:12
- S40 Ion 11:25-26
Iesu 'asa'aiana 'ada'ada mogitana.
41Me Diu ma yadi nuasako i vebonavoluvolu fai Iesu i vo, Yau 'ami'ami a mai abamega.” 42Begaidi i vo, Awale igodi bani'odi i voneyedi i vo, A obuma abamega”? Tamana wata inana ta 'asetadi. Iesu tomotogaotoga, Iosefa natuna.” 43Iesu i vonedi i vo, Kebu 'aise'avami 'wa na vebonavoluvoluga. 44Kebu tamu aitoi 'ana fata taunina yana nuanuayega i na mai 'waikuye, Tamada 'aku tovetune nagami i na 'ivaiseni yana nuanua i na sivilai bega 'ana fata taunina i na tauyeni 'waikuye wata tutuyanina tomotoga 'wa na vonayavuga Yaubada mataneye a na sivetovoia. 45Basenadiotoga yaku vonanina faifaina Yaubada yana tolu'ivonavo i kilumi i vo,Tomotoga matatabudi Yaubada i na 'ivaisedi wata i na ve 'waidie.”
Begaidi egavo Tamada yana vona i na nogai bega i na ve 'waidie, 'adi fata i na maia 'waikuye. 46We'e 'omi kebu tamu aitoi Tamada i da 'iseniga, yau 'aiseotogiku a 'iseni fai a mai taunina Yaubada 'wainega. 47A vona mogitana 'waimie, egavo ma yadi vetumagana taunidi i tauyedi 'waikuye, 'akonadi mia 'atumaina wata miamia-vagaina i veluagai. 48Yau 'asa'aiana kumaniku 'ani'ani. Yau mia 'ivauna wata 'atumaina 'ana to'anivelena tomotoga 'waidie. 49Basenadiotoga sali'avu'avuye tubudavo 'ani'ani abamega i 'ani siwe kebu i da mia-vagata i wafa. 50We'e 'ani'ani mogitana i obuma abamega egavo i na 'ani, kebu i na wafaotoga. 51Yau 'asa'aiana kumaniku 'ani'ani abamega a obuma. 'Ai'edi egavo 'ani'aninina i na 'aniaga kebu i na wafaotoga i na mia-vagata. 'Ani'aninina a vonevoneyeniga tomogoku a na tauyeni bega tomia fwayafwaya matatabumi 'ami fata mia 'ivauna wata 'atumaina 'wa na veluagai.”
52Me Diu Iesu yana vona i nogai ma yadi nuasako 'aise'avadi i ve'ikwayekwayega i vo, No'o tomogo bani'odi i na munega tomogona i na veleda ta na 'ania? Kebu tamu sai'afo i da lubwaineni.” 53Iesu i vonedi i vo, A vona mogitana 'waimie, yau a vetomotogaotoga 'ai'edi egavo kebu tomogoku i na 'aniaga wata dayagiku i na yemuyaga, kebu 'adi fata mia 'ivauna wata 'atumaina i na veluagai. 54Egavo tomogoku i na 'aniaga wata dayagiku i na yemuga 'akonadi mia 'atumaina wata miamia-vagaina i veluagai wata tutuyanina tomotoga 'wa na vonayavuga Yaubada mataneye a na sivetovoidi. 55Fai, tomogoku 'ani'ani mogitana, wata dayagiku alu'ai mogitana. 56Egavo tomogoku i na 'ania wata dayagiku i na yemuyaga a na miamia nagedie yau 'adi labilabina wata i na miamiani nagekuye. 57Tamada 'aku tovetune miamia-vagaina kebu yana 'a'avaga begaidi yana toketokena 'wainega a miamia. Wata bani'odi egavo i na 'anikuga yaku toketokena 'wainega i na mia-vagata. 58Basenadiotoga tubudavo sali'avu'avuye 'ani'ani abamega i 'ani, siwe kebu 'ani'ani mogitana begaidi kebu i da mia-vagata i wafa. We'e yau 'ani'ani mogitana, abamega a mai 'ai'edi egavo 'ani'aninina i na 'aniaga i na mia-vagata.”
59De'e Iesu yana ve, i lau'age tomotoga 'waidie 'atamana Kafaneomi, 'eba miava'auta nageneye.
- S45 Ais 54:13S46 Ion 1:18S47 Ion 3:16S48 Ion 6:58
- S54-56 Mad 26:26-28
Tovetutuyamavo 'ifwaidi Iesu i baileni.
60Tovetutuyamavo fuedi Iesu yana vona i nogai 'aise'avadi i veifufu i vo, Iesu yana ve 'waideye 'ana nogaya vitana, kebu nuanuada. Kebu tamu aitoi 'ana fata i na 'asetai.” 61Iesu i 'asetai yana tovetutuyamavo i vevebonavoluvolu yana ve faifaina begaidi i vonedi i vo, Yaku ve faifaina voke bunumi i mayaga. 62Yaku venina vitana 'waimie kebu nuanuami, siwe 'ai'edi 'wa na 'iseku yau a vetomotogaotoga a na vilaku a na laka abame, 'waimie vitaotogina. ▼▼Iesu i veifufu yana laka abame wata yana wafa faifaidi. Yana wafa 'waineye yana tovetutuyamavo i bunumayaga i ve'aladegadega.
63'Anu'anunu 'Atumaina 'aiseotogina 'ana fata mia 'ivauna wata 'atumaina i na velemi, kebu tamu wata aitoi 'ana fata i na 'ivaisemi bega mianina 'ivauna wata 'atumaina 'wa na veluagai. Yaku vonanidi 'akonadi a voneyediga 'anu'anunumi 'adi 'aivaita, 'waidiega 'ami fata mianina 'ivauna 'wa na veluagai, siwe 'ifwaimi kebu 'wa da vetumagana.”Iesu de'e bani'odi i voneyediga fai nagami i 'asetai egavo kebu i da vetumagana, wata 'waidiega kumanina 'awaie i na 'etogiluveni i 'asetai. 65Wata Iesu i vona tomotoga 'waidie i vo, Yaku ve 'ana nogaya vitana 'waimie, faifainanina basenadi a vonemi a vo, Kebu tamu aitoi 'ana fata taunina yana nuanuanayega i na mai 'waikuye, Tamada nagami i na 'ivaiseni yana nuanua i na sivilai bega 'ana fata taunina i na tauyeni 'waikuye.”
66Yana vonanina faifaina yana tovetutuyamavo 'ifwaidi i baileni, kebu nuanuadi wata i na vevetutuyameni. 67Begaidi Iesu yana tovetutuyamavo 'adi 12 i velutoliedi i vo, We'e 'omi bani'odi? Nuanuami 'wa na baileku 'wa na nagoi?” 68Saimoni Fita yana velutoli i tutuli i vo, 'Auvea, kebu 'ana fata tamu wata aitoi 'waineye 'a na nagoi. Yamu vona 'waidiega 'ama fata mia 'atumaina wata miamia-vagaina 'a na veluagai. 69Tutuya de'e 'a 'asetamu wata 'a vetumagana 'omu Yaubada Natuna Magemagetamu.” 70Iesu i vonedi i vo, Vona mogitana 'ami 12 a venua'ivinemi, siwe 'waimiega tamu Seitani iana.” 71Iesu i vonavona Iudasa faifaina, taunina Saimoni Isakaliota natuna wata tamu 'adi 'aila'a 12 'wainega, siwe taunina Iesu 'ana to'etogiluva.
- S63 2 Kol 3:6S65 Ion 6:44S69 Mad 14:33, 16:16
Copyright information for
YML